‘I he ‘eku ‘alu atu ki he feitu‘u hiki vitioó na‘á ku manavasi‘i. Na‘a mau lue atu ki loto pea na‘á ku ongo‘i lelei ange ‘i he taimi na‘á ku sio ai ki he maama mo e lanu lelei ‘a e feitu‘ú. Na‘e fakahoko mai kiate au ‘a e me‘a tofu pē ‘e hokó pea na‘á ku fetaulaki mo e kotoa ‘o e kakaí. Na‘a nau anga-fakakaume‘a ‘aupito mo angalelei.
Na‘á ku ‘alu atu mo e tokotaha faka‘eke‘eké ki ha loki na‘e ‘i ai ha ki‘i me‘afaitā vitiō si‘isi‘i, pea na‘e ‘alu ‘a e ‘ōfisa polisi fefiné ki ha loki ‘e taha ‘a ia na‘á ne lava ai ‘o sio mai kiate kimaua ‘i ha TV ‘i ai. ‘I he ‘ema maaú na‘á ne kamata leva ‘a e vitioó.
‘Uluakí, na‘e ‘eke mai ‘e he tokotaha faka‘eke‘eké ha ngaahi me‘a ‘e ni‘ihi ke fakapapau‘i na‘á ku mahino‘i mo‘oni ‘a e fiema‘u ko ia ke u tala ‘a e mo‘oní. Na‘á ne ‘eke mai leva ha ngaahi fehu‘i fekau‘aki mo e me‘a na‘e hoko mai kiate aú. Na‘e ngofua ke u tā valivali lolotonga ‘ema talanoá, pea na‘á ne ‘ai ai ke faingofua ke talanoa pea tali ‘a e ngaahi fehu‘í. Na‘á ku ‘ohovale ‘i he lahi ‘a e me‘a na‘á ku manatu‘í. Tuai e kemo, kuo ‘osi ia. ‘Oku ‘ikai ha ‘uhinga ke ilifia ai ‘i hono fa‘u ha vitiō.
Hili ha uike ‘e ono na‘e puke pōpula ‘a e tokotaha faihalá, pea tali halaia.
‘E ‘ikai ke toe ngalo ‘iate au ‘a e hokosia ko ení ka ‘oku ‘ikai ke u toe fu‘u fakakaukau lahi ki ai he taimí ni... Ko e me‘a na‘e tokoni lahi mai kiate aú ko e ma‘u ko ia ha ngaahi founga tokoni ki he mo‘ui leleí (therapy) mo e kau atu ki ha kulupu fepoupou‘aki ‘a e kakai fefiné.